Saturday, March 29, 2014

Mbeya city yainyima usingizi Azam fc

KLABU ya Azam FC imeonesha wasiwasi wake
wa kutwaa ubingwa wa Ligi Kuu ya Tanzania
bara kwa mara ya kwanza kutokana na ugumu
wa wapinzani wao Mbeya City ambao
wanatarajia kucheza nao hivi karibuni.
Katika mchezo wa kwanza uliofanyika kwenye
Uwanja wa Chamazi Complex Novemba
mwaka jana, timu hizo zilitoshana nguvu kwa
kutoka sare ya mabao 3-3, na kasi hiyo ya
Mbeya City iliyopo kwenye nafasi ya tatu kwa
sasa imeonekana kuwatisha Wanalambalamba
hao na kuhofia kupoteza nafasi ya ubingwa.
Akizungumza na gazeti hili jana Katibu Mkuu
wa Azam Nassor Idrissa, alisema mchezo huo
ni mgumu hasa kulingana na ubora waliokuwa
nao wapinzani wao Mbeya City lakini
watajitahidi kushinda.
“Ni mchezo ambao tunaupa uzito wa aina yake
kwa sababu Mbeya City ni timu bora licha ya
uchanga wake ndiyo maana tunataka kwenda
Mbeya kwa tahadhari kwa sababu endapo
tutapoteza mchezo huu, hata ubingwa
unaweza kuota mbawa,” alisema Idrissa.
Idrissa alisema, pamoja na kwenda kwa
tahadhari kubwa lakini wamejiandaa
kuhakikisha wanapambana na kupata ushindi
ugenini ili kujijengea mazingira mazuri ya
kuweza kuchukua taji hilo la ubingwa wa Ligi
Kuu kwa mara ya kwanza.
“Kocha Joseph Omog ametuhakikishia
kwamba kikosi chake kipo vizuri na kinaweza
kuweka historia kwa kunyakua ubingwa wa
bara msimu huu kwakuwa hakuna
linaloshindikana kama wao walikuja kwetu
wakapata sare na sisi tunaweza kuwafunga
kwao,” alisema Idrissa.
Azam ambayo ndiyo vinara wa Ligi Kuu
Tanzania bara wakiwa na pointi 50 kabla ya
mchezo wa leo dhidi ya Simba, hawajapoteza
mchezo hata mmoja katika mechi za ligi na
endapo watashinda mchezo huo na Mbeya City
watakuwa na nafasi kubwa ya kutwaa ubingwa
msimu huu.

No comments:

Post a Comment